Raggashanti New Year Tekki-Back Mix Up

Mi deh ya! Mi deh ya! Mi deh yaaaaaaaaaaa!! Bless up unu self people. All Tambareen Fambily linky-linky large up, an bless up to all Mix Up an Blenda crew. An unu know mi naa lef out all a mi listeners pon Tambareen Radio ova MixUp Yaad(mixupyaad.com).
Di 2012 staat good. Di 12 a shot aready. Di DOZEN already a shape up to be an excellent year. An mi give tanx fi dat.


Mix Up time:
Mix Up Big Up to di woman who ketch har man a french kiss a schoolas inna a JUTC bus. Shi move to di schoolas fi done har, but di schoolas would a kill it inna di bus! Di woman get crazy bax an kick an all couple bite unda har structa.


Mi tell unu big woman all di while, unu fi careful wid dem gangsta, man-tief schoolas deh. Nuff a dem a hot skull, and dem nuh have no problem a tek unu man an beat unu pon tapa it. Is a new breed a schoolas a roll out deh. Tek heed!


New Year Tekki-Back Mix Up
Raga mi used to talk to this guy. When we were together we decided to live together and we combined our furniture. One a di furniture that him did bring in was a music component set. Our relationship went good for awhile but we eventually decided to break up.
When we were breaking up we decided that we each should take back the furniture that we brought in to live together. But after we both took everything we each brought in he told me that I could borrow the music system for a while because he was not going to need it at that time. He did say he was going to take it back. Raga he went and bought a different music system for himself and never asked back for his first system. For more than a year we've been separated and he's seeing other women and I have a new man.

Raga the problem is that he has now decided to settle down with a new woman and now wants to give her the music system that I have. Raga him mad! How him fi waan give his new woman our component system? How him fi waan give her it when a him tell me not to buy one for myself and to just continue using it for myself? Look how long mi have it. And now him waan fi jus give it to him new woman that him love. Raga if him did a keep it fi himself it woudn't matter, but him cannot jus' waan come give it to woman so. Jus all of a sudden so. Even if him did buy me a different set mi still wouldn't waan give har di one that mi have. It just dont feel right. Something wrong wid dat Raga. She can have him, but she cannot get the set. Raga a regular me an him did always a sort to music from the system. Him naa think Raga.

It look like a you mad. Di man did done tell yuh say him definitely a guh tek back him component set. Suh wa confusing about him now being ready fi tek it back? Mi know yuh might feel a way say him a guh gi it to him new woman. And mi know it wussara difficult dat yuh an him did shell nuff sort out fram music outa di system. But all dis still nuh change di fact say him did very clear say him neva give it to yuh. Him tell yuh clear clear say him a guh tek it back. So now yuh cyaan a talk bout "OUR" component system. Yuh cyaan mek romantic sentiments an emotions mek yuh violate. Probably him shoulda jus tek it back from yuh an nuh mek yuh know wa him a guhdo wid it. But a still fi him system, an people free fi do whateva dem waan do wid dem property. Yuh an him nuh deh again, suh leggo di system. A new woman inna di pitcha, new ride, an new ratings, so if him waan gi him new woman something weh him own den him free fi do dat. Stop medz yuh ex-man ting an gwaan pree yuh new man ting. Leggo di system. Free up di ting.